Bharat Gaurav Train Mizoram a lo lut hi tourism tan mellung lian takniin, Mizoram tourism chawikan nan a pawimawh hle a ni.

Sorkar thuchhuah tarlan danin, Bharat Gaurav Train hi Agartala, Tripura atangin a lo thleng a, khualzin 81 rawn phurin USA leh Nepal khua leh tui te pawh an tel a, Tourism Department official te chuan lo kalte hi thilpek an lo hlan a ni. Khualzinte hian vawiin khan Aizawl leh a chhehvel an fang kual a, an fante zingah Aizawl Zoological Park, Solomon’s Temple, Mizoram State Museum leh Aizawl Peak te a tel a ni. 

Zanin dar 7 hian riak lovin Dimapur, Nagaland lam panin an chhuak leh dawn a ni. An zinkawng hi Delhi atanga tanin February ni 3,2026 khan an rawn chhuak a, Manipur tih loh chu India hmarchhak state zawng zawng an tlawh ang a, February ni 18, 2026 ah Delhi khawpui an let leh dawn a ni.

Bharat Gaurav Train hi khualzinte tana siam bik niin mi 150 a phur thei a, a chhungah restaurant pahnih leh spa te awmin rel dang nen a inang lo a ni. Kum khatah vawi khat India hmarchhak tan bik Indian Railway Catering and Tourism Corporation hian tour package an siam thin a, a duh apiang tan a tel theih a ni. Himangshu Bhatt, Train Manager in Department officials te rel a fan kualpui hnuah mikhualte Aizawl lam panin an thlah liam a ni.